Act 12 | ASO | STEP | A'mine gameneu' guvelesi ve naba ma minine' gulive Helode' aza Izesu' zuho linge ma ne lovo zatuho' o ngemo

Acts 12

Helode' Lavo Zakobo'ni Nene Bili Hili Petolo'ni Nalava Imani' Gamazi

1 A'mine gameneu' guvelesi ve naba ma minine' gulive Helode' aza Izesu' zuho linge ma ne lovo zatuho' o ngemo 2 ei' lavo Zohane' uvoloho Zakobo'ni luvono gitani'. 3 Ne'mine ikevo Zuda ve mulu'ningu' lamine' gilani' nene ningo gohi lavo O'moso'mo Zuda veti avo'ningine ise'ine izingumu' gili mini lulu izamine' beleti naa' ani' holiseku' nene Petolo'ni nala' numungu' huli-dani'. 4 A'mine holise' osu' lavo Zuda veti a'ningu' molokuvo goni' i-di bililizave lo gelo analo' do nala' numungu' ele'mize molo pilisi ve sita've sita'velite gizebo i-dika' i-dika' ilizave lo pilisi ve sigisitini (16) ngele'mize molani'. 5 Ne'mine ogavo Petolo' nene nala' numungu' neivo gizebo i-di nizavo Izesu' evenele zuho ezemu' O'mosola amuzo mili li minani'.

Angeloli'mo Petolo'ni Nala' Numunguti' Kuluhize-dine' Gamazi

6 Helode' aza Petolo'ni do eveneliti a'ningu' ngemelesa ine' gamene alitavo a'mine holuka' nene Petolo' ana helala nene di pilisi ve mali'mi anasi di hamo' igi senitunu' izi-ngidi ido' ana helala nene a'mine'mine igi pilisi ve mali'mi anasi di hamo' igi izi-ngidani'. Ne'mine iki ingi nizavo pilisi ve linge ma nala' numuno'mi gatedo' gizebo igi minani'. 7 Ti' igi nizavo Guvelesi ve'mi angelo' mali'mo lite' mate' lo soto' neivo numuno lulou' labana' iline'. Ne'mine ogavo angelo' aza Petolo'ni gapilelo' izo u'muko' o-do ti' lo line': Geto otezo. Lavo Petolo' analoti' seni ne apase'mozavo 8 angeloli'mo ti' lo lo-imine': Letika do izezo. Ido' gizengalo' nite' do izezo. Lavo ne'mine ogavo ti' lo line': Okongalo' inite' ha'na ma do izo ne'meto ano. 9 Lavo do izo angelo' ogo molo ine' nene ningo gele lamine' amo haza vamu' noninguhe lo gelo e'meto vine'. 10 Vi pilisi ve gizebo igi nizavo ngivile' iki pilisi ve gohi ma a'mine'mine igi gizebo igi nizavo a'minesi ngivile' igi gateni naba ainidunu' lili' ani' a'mingu' ebe' nabala limi vaa' ani' gatedokisi hetelikesivo a'mine akahe ne'mo asi've engikumu' si'zeko vavo limi aka hamo' huliki neloti' lite' lo angelo' nene Petolo'ni hulo-do vo haha ine'. 11 Ido' vo haha ogavo Petolo' galau' ngolo' lavo ti' lo giline': Naza Guvelesi ve'mo angelo've imiselo Helode' anauti' apase-nedo Zuda vete i-nidilisa gilanguti' kuluhize-nidine' nene gihile izavo idise gelekuve. 12 Ti' lo ningo gelo Zohane' ado' gulive naba Maleko' ve lo minine' ne'mi izeleho Malia' numu'veu' vo heteline'. A'mingu' evene' muki' di gese' igi mini O'mosola li minani'. 13 Li minangu' vo hetelo aza gatedo' vo okoho' izavo gelekele' alu ma minine' gulive Loda' nene akahe si'ze-delesa ogo 14 Petolo' nolo gelo mulunou' lamine' gelo akahe si'zamo velepe' izo loti' izo vo evene' ti' lo lo-ngimine': Petolo' nene gatedo' omo neive. 15 Ne'mine lo lo-ngemavo ingine ti' li lani': Dudu gamazi nolabe. Likevoo o've. Lamine' noluve lo amuzo molo lavo angelo've noloseive li lani'. 16 Ne'mine nilavo Petolo' gatedo' okoho' ha izo neivo akahe si'zi eze ningi vo'ine vavo upuho' goloso ani'. 17 Ne'mine ikevo anatunu' avazaha ogo gamazi o've lo-ngedo Guvelesi ve'mo nala' numunguti' kuluhize-dine' monovo lo-ngemo mene gamazi nene Zakobokisi leze zuho linge masi li-ngimilo lo velepe' izo ebe' mala vine'.

18 Vavo go' lavo pilisi ve Petolo'ni nadi' i-dave li gopo ga'ine gili angise'ine no'ningu' gamazi muki' li volelo' melo' ani' ve. 19 Ne'mine ikevo Helode' vise' ilizave lavo vise' igi igi di soto' amavo Petolo'ni gizebo ani' pilisi ve longo' minge' o-ngedo ngibili huli huli' ilizave lo lo huko-ngidine'. Lo huko-ngedo Zudaia misubo hulo lemo Kaesalea ebeku' vo minine'.

Helode' Hiline' Gamazi

20 A'mine gamene neu' Tilo alevemukisi ido' Sidoni alevemukisi Helode' izebolo' goloso molavo lovo gize ngimine'. Lovo gize ngemavo a'mine misubo ne'mi me'ninge nete gamazi'ine di hamo' igi ingine zuho noso' inite'ine guvelesi ve'mi misuboloti' meni hizi ni minani' nenako nemu' nene vi gomu' lele'mize lamine' ilingumu' ve li Helode' oko'nolo' niteto' gizebo o-daa' ive ma gulive Bilasito'ni gala di Helode' neida dizi igi zogo imi mulunou' do hongu liline' gamazi li-imani' ve.

21 Ne'mine ikevo Helode' aza gamene molani' gamene alitavo ei' guvelesi ve'mo ngolaa' ine' inite' nene do ngolo mino guvelesi ve'mo minaa' ine' mo'mosi'velo' mino eze zuho gamazi lo-ngimine'. 22 Nolo-ngimivo evene' ingine eveneli'mo lamive. O'mosoli'mo line' ma ve li gamazi naba lani'. 23 Ne'mine likevo aza nene neni' nopo'ni lami O'mosovo' opo'ni lilo lamivo O'moso'mi angeloli'mo belavo oko'no ginine hizavo hiline' ve.

24 Ido' O'moso'mi gamazi ne'mo hutile' ogo hilulu' pilulu' izo vine'. 25 Zelusalemi ebeta gono ngimine' nene di osu' li Banabasiki Sauloki Adiokia ebeta tine' mili vilisa niigi Zohane' ado' gulive naba Maleko' ve lo mininekisi nene ele'mizi vasine' ve.